:(

ماكنتش عاوزاك علشاني تتغير ..
كنت عاوزة بس حُبي تقدّر .

شاهي

بالنسبة للأبراج يا بنات ويا رجال ..

#وجهة_نظري

ركزي معايا حبيبتي ..
*مافيش بنت مش عاوزة الرجل يهتم بعقلها وثقافتها وروحها قبل شكلها .. بس يعني تهملي في نفسك وتقول لي أصل له بيحب روحي هايبص على أول ذيل فستان معدي من جنبه ،
( حقه الصراحة ) خصوصاً لو كان لمح لك
*مافيش بنت مش عاوزة تحس بالإهتمام وإن الشخص اللي بتحبه بيخاف عليها وبيهتم بمشاعرها ..
*مافيش بنت مش بتتمنى إنه يحس بيها ويحس بوجعها ووقت الأزمات يكون داعم قوي لها ..
*مافيش بنت مش بتتمنى تلاقيه بيساندها في أحلامها وطموحاتها ..
*مافيش بنت بتحب الكذب والخداع والخيانة .. كلنا بنحب الصراحة والوضوح والإخلاص ونكره اللف والدوران ..

كل البنات كدا إلا من ندر منهن اللي بتكون عايشة بلا هدف ..

بالنسبة للرجل يا أختاه ..
*مافيش رجل مش مودي قاعدة ثابتة اعرفيها كلهم مِزاجيين ..
*مافيش رجل بيحب الزن ممكن يجي بالزن بس علشان يريح دماغه لكن ممكن أكثر يعند علشان تبطلي زن ..
*مافيش رجل عينه مش زايغة قاعدة ثابتة أخرى علشان تريحي دماغك بس المهم طريقة وفكرة زوغان عينه بمعنى ...
- فيه رجل يعجب بالجمال مش أكثر دا اعتبريه صديق وتجاوبي معاه عادي وهزروا ..
- وفيه رجل يعجب وعاوز يجرب دا يعني جاريه في كلامه بس ماتشجعيهوش وحذريه بهزار ..
- وفيه رجل بقا يعجب بالجمال وعاوز يجرب ولازم يجرب دا تدي له فوق دماغه وترميه من حياتك أصلاً ..

*مافيش رجل بيحب الخيانة والكذب واللف والدوران ( بيقولوا كدا ) بس ماعلينا يعني
*مافيش رجل مش بيحب الخروج والفسح إلا من ندر منهم قوي قوي ..
*مافيش رجل رومانسي 24 ساعة سعادتك كدا مش هاتلاقوا تاكلوا بس على مستوى آخر فيه رجل مهتم ( الإهتمام غير الرومانسية خااالص ) ..

في المطلق العام مافيش رجال ملاعين ولا فيه نساء ملعونات ..
ومافيش أبراج متوافقة ومافيش أبراج غير متوافقة والدليل ..
ممكن تلاقي برجين يقولوا دول مش متوافقين ويبقوا سمن على عسل ..
والعكس برجين المفروض يكونوا آخر إنسجام بس تلاقيهم آخر شد وتقطيع في فروة بعض ..

ف الموضوع مالهوش دعوة بالأبراج خالص دا ليه دعوة بالشخصية اللي معاك/ي وأخلاقه/ا ..

جاري التعديل لو افتكرت حاجة تانية
شاهي

الروح

والروح تصرخ هل من منصت .

 

شاهي

أنا مج ..

متعلق على رف الدنيا جوايا فاضي ..
يوم تلاقي جوايا سخن ، أو بارد ويوم يبقى جوايا فريش ..
يفتكروني وقت العوزة ولو مش متعاز أنا دايما متلعق ع الرف ..
وإن لحظة سهوة وقعت لو ما إنكسرت يبقى أكيد إنشرخت .
أنا مج .

شاهي

إلى رجل أحببته من سويداء القلب ..

فــَ لتشهد أني قد غفرت لك ..
أُشهد الله أني قد غفرت لك ..
أُشهد الكون أني قد غفرت لك ..
أُشهد البشر أني قد غفرت لك ..

غفرت لك تجاهلك ، غفرت لك لامبالاتك ، غفرت لك صمتُك ، غفرت لك عِنادك ،
غفرت لك جنونك ، غفرت لك نسيانك لي ..

فـ اشته ما شئت من النساء ..
أحبب من شئت منهن ..
انهل من نبيذ شفاههن ..
وارتع بين ربوع مفاتنهن ..
 
امض إلى المستقبل دون ذنبي فقد طهّرتك منه ..

فـ المغفرة لي ..
والقلب لي ..
والحُب لي ..
والنسيان لي ولك .

شاهي

احببتك

أحببتك روحاً لا جسداً ..

وأحببتني جسداً لا روحاً ..

فلم نلتقِ .

شاهي

السعادة

والسعادة إيه غير قلب يحبك وطفل يحضن قلبك..

شاهي

يا رب نفهم

مش مهم الحُب يكمل ..
المهم الإحترام يفضل .

شاهي

رسالة

إمبارح في وسط كلامي مع صديق قلت الجملة دي :
حتى اللي كنت بأحبه ماعرفتش أحبه صح ..
وكان رده :
ما هو علشان إنتي مش إنتي لكن لو بقيتي إنتي هتبقى جبارة و تتحبي في لحظة ..
عيشي حياتك بطريقتك مش بطريقة الناس ..

وألاقيني أرجع فلاش باك لكل تصرفاتي وأفتكر كل المواقف تقريباً كل كلامي ألاقي إن دي مش أنا ..
للأسف أنا حبيت بس مش بطريقتي أنا ، مش بأفكاري أنا ..

علشان كدا يوم ما تحب حب بطريقتك أنت ، بأفكارك أنت ، علشان تعيش كل لحظة وأنت مستمتع بيها ..

مش لازم تكونوا شبه بعض .. كفاية تكونوا فاهمين بعض ..
مش شرط الحب دا يكمل ، كفاية إنك عشت الحُب بكل كيانك ..

وإلى من أحببته إذا كنت تقرأ ( غالباً لاء يعني ) :D
أحببتك بعقلك ولس بعقلي ولهذا لم تشعر بي .
شاهي

...

برد الشتاء أرحم كثيراً من برودة كلمات بعض البشر ..

شاهي

الحب

الحُب هو الحُب سواء في البُعد أو في القُرب ..

شاهي

التميز

كل رجل هو " رجل عادي " نحن من نميزهم بحبنا لهم ..
يعني لو مات النهاردة مثلاً الكون هايتأثر ؟؟
لأ هايمشي عادي ، هانزعل آه ..
لكن الدنيا ماشية ، والحياة مستمرة ..

وكل أنثى هي " أنثى عادية " ونتميز بحبهم لنا ..
( علشان ماحدش يقول إني عنصرية ) :D

الحب هو ما يجعل هذا الشخص بالذات مميز عن غيره ..
لكن لا فرق بينه وبين غيره .

 

شاهي 

من ذكرياتي

وقت المغربية دا كان وقت منفصل عن أي وقت بالنسبة لي ..

في بيتنا القديم كان بيحاوطنا من كل ناحية تقريبا غية حمام وكنت أحضّر كوباية الشاي بالنعناع وأفتح الراديو على إذاعة الأغاني وأقف في الشباك ( والشعر الحرير يهفهف ويطير ) وكدزا

وأقف أتفرج على أسراب الحمام وهي طايرة وجنبها تلاقي طيارتين ورق أو ثلاثة طايرين معاهم وأنت قلبك وعينيك متشعلقين في السما ما بين الطيارات وأسراب الحمام وأصحابها بيشاوروا من كل غية بالأعلام للحمام ..

وكنت أفكر إزاي كل طير من دول عارف إن دي غيته مش واحدة ثانية رغم إنهم جنب بعض وإزاي عارفين إن دا صاحبهم !! ..

كنت أسرح في الملكوت الجميل دا مع صورة غروب الشمس بلونها البرونزي وسط السحاب المتلون ما بين الأحمر والذهبي والأزرق والأبيض وكأنها لوحة مرسومة ..

وإذاعة الأغاني تشدو بأغاني الزمن الجميل ..

أنا مستعدة أدفع الغالي والنفيس علشان أسترجع اللحظة دي وأعيشها من تاني وأفضل فيها .

 

شاهي 

طمعانة

عارفة إن كل حاجة اتمنيتها وماتحققتش ليها حكمة ..
عارفة إن كل وجع اتوجعته كان لسبب وهايكون لسبب ..
عارفة إن كل دمعة حزن بكيتها هاتتحول يوماً ما لـ دمعة فرح ..
وأثقة في حكمة وعدل ربنا ..
صدق من قال وكان الإنسان عجولاً ..
وعلشان كدا أنا طمعانة في كرمك يا رب 

شاهي

أحبك

أُحبُكَ تعني ..

أنت أولاً ثم الأخرون لاحقاً .

شاهي

نفسي تفرحني

كلمة وحشتيني بتفرحني أكثر من كلمة بأحبِك .

 شاهي

 

 

حُضن

الهروب من كل الأوجاع جوة حُضن ..
الراحة والسكينة جوة حضن ..
الأمان جوة حضن ..
الطفولة جوة حضن ..
الرجولة والأنوثة جوة حضن ..
الرحمة جوة حضن ..
السعادة جوة حضن ..
وكل الوجع جوة حضن .

شاهي

احببتك رغم غرورك

غرور الرجل لا ينتهي عند حب إمراءة له بل يزداد ..

غرور الرجل ينتهي عندما يحبها حقاً .

شاهي

إلى رجل سأعشقه ..

الأنبوبة خلصت يا حبيبي :D

 

شاهي 

إلى رجل سأعشقه..

يمكن أتخن سااعات يمكن أخس ساعات
لكن تأكد إني هأبذل ما في وسعي إني أفضل جميلة في نظرك..

يمكن أطبخ مرة الأكل يكون حلو مرة يكون مالح شوية.. عذب شوية.. مستويي شويتين
لكن تأكد إني هأكون واقفة في المطبخ بأفكر فيك..
.
يمكن ازعلك ساعات :@
يمكن تزعلني ساعات
لكن تأكد إني عمري ما هأتخلى عنك في أي وقت تكون محتاجني هاتلاقيني أول إنسان جنبك ..

أوعدك إني أتحمل عيوبك وأعشق ميزاتك أنت بس قدرني في كل حالاتي هاتلاقيني زي ما بتحلم
شاهي

كنت ..

كنت صدقاً أهتم ..

لأني صدقاً أحببت .

 

شاهي

وجهة نظري

أغلب البنات إن لم يكن جميعهن يعني .. لما موضوع حب أو إرتباط بينتهي في حياتها ..
صديقاتها البنات يفضلوا يقولوا لها إنتي تستاهلي الأحسن .. هو مش هايلاقي زيك .. ملهوش في الطيب ، وكلام تاني كتير أكيد البنات عارفاه يعني

لكن الحقيقة هو هايلاقي الأجمل والأحسن وإن هي دي اللي تستاهله وإن اللي فات كله كان أي كلام ( طبعاً من وجهة نظره )

ولو البنت لسا بتحبه هاتشوفها كدا برضوا لأنها بمجرد إنه لاقىَ غيرها هاتفكر إنها أكيد الأقل علشان كدا ماكملش معاها .. ( ودا أساسي غلط )

لكن من وجهة نظري ( فيلسوفة بقا ) :D

إن الموضوع يندرج تحت 2 بند ..

البند الأول : الكيمياء - وهو إن كل 2 بينهم كيمياء مهما عملوا مابيقدروش يبعدوا لأنها حاجة كدا زي ال ( H2O ) ماينفعش ينفصلوا إلا في معمل كيميائي بمعنى برة الطبيعة ..
ف تأكدي إنكم إنتم الاثنين الكيمياء بتاعتكم مش متوافقة وبمنتهى البساطة خلاص ماينفعش ..

البند الثاني : المصلحة - وهو إن فيه ناس الإرتباط بالنسبة لهم عبارة عن مصلحة بحتة فيه كيمياء مافيش هو كدا الإرتباط دا علشان دي مصلحة وبس ..

وفي الآخر كل إنسان له إنسان بيكمله ، بيتحمل معاه ويكون جنبه في كل حاجة ..
الوجع قبل الفرح ،
المرض قبل الصحة ،
الأزمة قبل الرخاء ،

تأكدي إنك هاتقابليه في وقت ما في مكان ما وهاتعرفوا بعض من غير ما تتكلموا حتى ..
وهايشوفك أكمل إنسانة وأجملهم مهما كان شكلك ومهما كانت ديفوهاتك

ملحوظة :
الكلام دا ينطبق على الجنسين لأن أكيد مش كل البنات ملائكة ولا كل الرجال شياطين .
شاهي

إحترام بلا حب..
أفضل كثيرا من..
حب بلا إحترام..

وشهامة بلا صداقة..
أفضل كثيرا من..
صداقة بلا شهامة.
شاهي

الأنثى

كل أنثى دائما تبحث عن إنها تكون المرأة الكاملة في نظر زوجها أو خطيبها أو الإنسان اللي بتحبه ..
بمعنى إنها تكون ست بيت شاطرة ..
وسيدة راقية ومثقفة ..
وأنثى تتمتع بالشكل والقوام ( الصاروخ ) زي ما هم بيقولوا

ودائماً تلاقيها هاتتجنن إزاي تخليه مايبصش لغيرها الأحلى والأجمل والأرقى ..

أنا لا أستثني نفسي من هذا يعني أنا مش العاقلة الرهيبة :))
لكن أنا وصلت لقناعة ( أنا أصلي فيلسوفة )

إن الرجل مهما عملتي علشانه هايبص برة مش علشان خاين ولا علشان هو يطمح للأحسن لاء ..
دا علشان هم كدا عيونهم تبحث دائما قبل عقولهم ( حقيقة ومايقدروش ينكروها )

فـ ماتتعبيش نفسك ولو أنتي عاوزة تكوني الأنثى المثقفة الراقية ست البيت الشاطرة اجعلي هذا لنفسك أولاً وليس لإرضاء أحد ..

وتذكري دائما " كلنا ناقصين ولا أحد كامل " ..

والراقون فقط هم من يدركون هذا ..

وعشق الروح باق لكن عشق الجسد فان
شاهي

إعترافاتي

* أعترف اني أنانية أريد كل شئ من حب ومال وعمل وسفر ورجل تتمناه النساء .
 * أعترف أنك كسرتني وكفى بالإنكسار إعتراف .
 * أعترف أني أريد أن أطير وأرى البشر كما لايرون أنفسهم .
* أعترف أني أحببتك أكثر من الشوكولا فبقيت هي ولم تبق أنت .
* أعترف أني مازلت طفلة تفرح باللعبة وتفرح بالحلوى .
* أعترف أني أكره الظلام يجعلني أشعر بالوحدة أكثر .
 * أعترف أني أحب غرفتي فأنا أعتبرها مملكتي .
 * أعترف أني أحب أن أحدق إلى قطي واحسده على ما يملك من رفاهية .
* أعترف أني أخطات في حق قلبي ونفسي ومشاعري وجسدي .
* أعترف أني لا أرتب غرفتي كما أريد .
* أعترف أن حياتي ليست كما تمنيتها وهذا يجعلني غير راضية بعض الأحيان .
 * أعترف أني لازلت أحمل داخلي بقايا إنسان يحزن أحياناً ويحب أحيانا أخرى ويغضب كثيراً .
 * أعترف أني تخليت عن صديقة لي لم أكن جانبها وقت مرضها نادمة ولا أسامح نفسي رحمها الله .
 * أعترف أني كنت إنسانة أفضل ، وأسعى لأكون الأرقى .
* اعترف ان نقطة ضعفي هي قلبي .
* أعترف أني تمنيت أن أعيش في هوليوود .
* أعترف أني أحيا بحب أبي وأمي فهم جذوري .
شاهي

لا يأس

نقطة ومن أول السطر ..

.

تحقيق الأمنيات بلا يأس .

 

شاهي

المثالية الغائبة

من زمان في كل حياتي كنت بأدور على المثالية ..
المثالية في الحب ،
المثالية في الصداقة ،
المثالية في العلاقات بين الأهل ،
المثالية في كل علاقاتنا في الحياة ..

بمعنى إني أتعامل بكل مافي حسن النية والطيبة وأتمنى لغيري نفس اللي بتمناه لنفسي وأشارك كل اللي أعرفهم أحزانهم وأفراحهم وأكون صادقة النصيحة والأحاسيس ..
( اللي يعرفوني شخصياً يمكن يوافقوني )

لكن ليس كل ما يتمناه المرء يدركه مع أول صدمة اكتشفت إني عايشة في دنيا لوحدي
( أي نعم ماتغيرتش كتير رغم إني حاولت )

لكن أصبحت حذرة أكثر .. وأصبحت عزة نفسي أهم عندي من أي شئ .. لكن البشر لازالوا يفاجئوني بما في جعبتهم ..

أنا ماكنتش أتمنى يوتوبيا على قدر ما كنت أتمنى المعاملة تكون بالمثل .. من غير المنطقي أكون بتعامل معاك بحسن النية والطيبة والصدق وأحترمك وأنت غير مقدر ، وتتعامل بالعكس وأنا أستمر ..

يا ترى العيب فيا أنا ولا في ظروف الحياة اللي خلت البشر يتعاملوا بهذة الطريقة الفجة ؟!!

إيه المبرر اللي يخليك تتعامل مع إنسان يحترمك ويقدرك بطريقة عكسية !!!

وعلى ما أظن أن هذا ليس عيب مجتمع على قدر ما هو اختيار الإنسان نفسه أسلوب تعامله مع غيره يكون ازاي .

 

شاهي

حياتنا

هذة هي الحياة ما بين قسوة الواقع وأمنيات القلوب .

 

شاهي

انتبه :

عندما تصبح الردود مختصرة ، أنت غير مرغوب بك ..

منقول

 وأنا أزيد ..

 عندما تصبح الإهانة أسلوبهم ، أنت غير مرغوب بك .. 

فـ احتفظ بما تبقى من كبرياء وابتعد .

شاهي

لا بديل

ولا أجد بديلاً غير الصمت والإنسحاب .

شاهي

تذكر

تذَكر كل دموعي وآمالي المعلقة بكلمة منك ،

 تذَكر كل صفعة خذلان ، كل إهمال ولامبالاة ، كل وجع أوجعته لي ،

 تذَكر كل شئ ، 

لأنك يوماً ما ستشعر بما شعرت به .

شاهي 

حُب الروح ..

الحب الحقيقي أقوى من النسيان وأقوى من الموت .

 

شاهي

.....

لم أكرهك أبداً ولن أفعل ,لكني أعترف أن حُبي لك كان أكبر غلطة بحياتِي لقد كَانَ جريمةٌ أستحقَقتُ أن تُعاقبني عليها أشد فراقْ وأقسَى خِداعْ .

 ساميه جلابي

 

إلى كل الفتيات ..

بصي يا حبيبتي خدي مني الجملتين دول وخليهم كدا زي المويبل في إيدك ماتستغنيش عنهم أبداً :))

* أولاً : الرجل لما تتصلي بيه ومايردش أنتي طبعاً بتكوني بتغلي ليه مابيردش وتبتدي الأفكار السوداء تظهر ، إنه يا إما مع غيرك يا إما يكون لا قدر الله ( من قلبي ) حصل له حاجة مش تمام ..
وفي الحالتين مش هاتبطل دماغك مشاوير من الفكرة دي للفكرة دي من المصيبة دي للمصيبة اللي بعدها :D

هدي نفسك خالص دا غالباً يا نايم يا خارج يا مش فاضي يا مش عاوز يرد ( آه بمزاجه )
يا إما فعلاً بقا مع غيرك يا إما لا قدر الله لا قدر الله حصل له حاجة فعلا ..
وف كل الحالات مش هاتعرفي تعملي أي حاجة مهما بعتي له مهما اتصلتي مش هايرد ..

في كوكب عقل الرجل إنه هو لما يفضى ولما يحب يكلمك هايكلمك بس كدا دا تفكيرهم وإستحالة يتغير
قضاء الله ولا مفر منه :S

*ثانياً : الأيام السوداء بتاعة الكهف اللي بيتقوقع فيها وينعزل هو مش بينعزل قوي يعني بس بيكون دماغه تايهة ومش عاوز اي ضغط من أي ناحية ها فاهمة من أي ناحية وطبعاً إحنا ملايكة لا بـ نضغط ولا بـ نزن ولا بـ نقلق عليهم ولا أي حاجة إحنا نسمة من نسمات الربيع :D

الأيام دي لازم هايبعد ومش هايكلمك خالص إنسيه المشكلة اللي بتقابلنا بس هو بيدخلها إمتى وهم كل أيامهم كهوف أصلاً

الأيام دي طبعاً إنتي بتكوني من جواكي بركان وهاتموتي كدا وتوصلي له علشان تطمني عليه صدقيني مش هاتعرفي إلا برضوا لو هو سمح بـ كدا ( جبروت ) :))

فـ برضوا ريحي نفسك لأنه مش هايرجع الإ بمزاجه وممكن يقابل أصحابه عادي طبعا إنتي تشوفي كدا تركبك العفاريت دا بيخرج أهو ومقضي حياته :/
هو بيعتبرها نوع من أنواع تغيير الهواء في الرئتين :))

وبعدين هايرتب الأولويات ممكن تكوني آخر أولوية فيهم بس في عقله أنتي كدا من الأولويات آه والله ولو اشتكيتي أنتي كدا جاحدة في نظره ..

* ثالثاً : لو أنتي محتاجة له جداً وبعتي له أنتي طبعاً منتظرة إتصاله بلهفة ويا حبيبتي طمنيني عليكي والخربوش اللي في صباعك عاوز له كونسولتو ( عاقلين ماشاء الله علينا ) :D

لو بعت لك رسالة على الفيس أو الإختراع الواتس آب أو الفايبر في عقله هو كدا يعني عمل مجهود جبار إيه نكران الجميل دا ..

هو كدا سأل عليكي فعلاً مش مهم إزاي المهم إنه بأي طريقة هو سأل خلاص ليه بتشتكي ..

فـ يا أختي نصيحتي يا تدوري على دكتور نفساني كويس يا إما تتعاملي زي ما هو عاوز ..
عارفة إنه صعب بل أقرب للمستحيل لكن هذة هي أقدارنا ..

وإنا لله وإنا إليه راجعون

أختكم فقيدة المرارة

شاهي

الصديق الحق ..

الصديق اللي بجد لا البعد يأثر فيه ولا الجدعنة تقل عنده مهما طالت بينكم المسافات ..

 هاتلاقيه وقت أزمتك واقف جنبك حتى لو كان في قارة ثانية مش بس في بلد ثانية.

شاهي

توقف الزمن ..

ويتوقف الزمن عند هذة الذكرى الهشة ..

 

لن أقترب ولن تعود .

شاهي

....

فيه ناس البعد عنهم ، يقربهم منك ..
وناس القرب منهم ، يبعدهم عنك .

 

شاهي

تغيرت

From close friends to restricted ..
نقلة كبيرة جداً من حياتي مش مجرد فيس بوك 

شاهي

تعددت الأسباب والحزن واحد ..

الحزن .. مش شرط يكون على حب ضايع وبس ..
فيه حاجات تانية ممكن الإنسان يكون حزين بسببها ..
إنه مثلاً عاوز يحقق أحلامه وطموحه ومش عارف يبدأ منين ..
مرض شخص في الأسرة وعجزه إنه يساعده ..
وفاة شخص عزيز عليه ..
أحوال الوطن اللي تجيب إكتئاب مش حزن وبس ..
وغيره وغيره ..
الحياة فيها كتير .. كل اللي علينا نعمله إننا نقاوح ونعافر لحد ما نتخطى الأزمات ..
ومش غلط إنك تستسلم شوية لحزنك وتتشارك مع أصدقائك فيه حتى ولو كان في عالم إفتراضي .

 

شاهي

سأنسى

نحن نتوهم أننا لن ننسىَ ولكن القلوب سُميت بهذا الإسم لتقلبها من حال إلى حال ..

لهذا فـ نحن نَنسىَ مثلما نُنسىَ .

شاهي

حان الوقت

وحان الوقت لبعض الأنانية ..

كفاية حنية

 

شاهي 

...

أنا أتمنى لك تعيش السعادة اللي اتمنيتها معاك مع غيري ..
 بس مش هاقدر أقولك مبروك .

شاهي

كل حاجة كان نفسي اقولها ليك وماقدرتش ...

 

  أنا عاوزة احكيلك انا جوايا ايه .. بفكر ازاي .. يمكن انت تعتبرها حاجة هايفة .. بس ارجوك اقرأ ...

في الاول كنت بعتبرك حالة وباعتبر نفسي حالة هاتمر في حياتك زي اي واحدة وكان نفسي تكون واحد يمر في حياتي زي اي واحد .. لكن انت امتلكتني حتى العظام .

     
كنت دايما أفكر ايه اللي ممكن يسعده .. كنت حاسة انك شفت وقاسيت كتير واني عايشة علشان اسعدك حتى لو ايام قليلة .. ايه اللي ممكن يخليه يحس بمشاعري ويعرف اني صادقة معاه مش بالف وأدور لما كنت بقولك اني غير البنات اللي تعرفها ماكنش قصدي اني احسنهم ولا احلاهم انا عارفة اني مش الاختيار الافضل بالنسبة لك ..وانك تعرف الاحسن والأفضل مني كتير اجتماعيا وجمالا وثقافيا كان قصدي اني مختلفة في حبي ليك .. لكن التعبير كان بيخوني كالعادة .

كنت دايما افكر وافكر ولما اتعب اقول كفاية اشمعنى يعني انا اللي لازم ادور على سعادة غيري وماحدش بيدور على سعادتي وكنت اقرر اني لما اكلمك او انت تكلمني اقولك يا هشام انا مش عارفة انا ايه بالنسبة لك عاوزة اعرف .. ابقى عاوزة اقولك قربني منك اكتر كنت ببقى عاوزة اقولك انا بجد باحبك انت حاسسني ؟؟

وبعدين اسمع صوتك او حتى تبعت لي رسالة اضعف واكون زي الطفلة التايهة وصوتك انت بس هو الطريق .. اني اسمع صوتك حتى لو بس ثانية واحدة وانا في مود وحش كان كفيل انه يغير مودي ويومي كله 360 درجة  ..

لما كنت بتغيب ومانتكلمش وأقلق عليك واتصل وماتردش كنت بطمن لما تكنسل عليا انك بخير ولو ماكنسلتش افضل اعمل ريفرش على صفحتك علشان بس اشوف لايك واحدة انت عاملها لأي بوست علشان اطمن انك بخير كان يكفيني قوي اشوف لايك واحدة ..

انا فاكرة يوم احداث المنيل انا فضلت صاحية لحد 6 الصبح وطول الوقت مترددة اتصل طيب اعمل ايه وفضلت فاتحة الصفحة اعمل رفريش كل دقيقة تقريبا مش بفكر غير اني اشوف لايك او بوست ليك يطمني عليك بس ماقدرتش واتصلت عليك وكنسلت عليا وبعدها شفت ليك لايك على صفحة يمكن تعتبر دا جنون بس مش مؤذي والله .. كنت قلقانة .. بأحس انك ابني وباكون خايفة عليك ..

كنت بزعل منك ساعات كتيرعلشان مش بتسأل وكنت بكون محتاجة لك قوي لكن مش بلاقيك .. عارفة انك وقت ما بتحب تكلم حد بتكلمه ووقت ماتبقى مش عاوز تكلم حد مش بتكلمه ودماغك مشغولة بمليون حاجة  .. ورغم ذلك مابقدرش ماطمنش عليك حاولت امنع نفسي كتير بس ماقدرتش كنت دايما خايفة اني لو سألت عليك اكون بأفرض نفسي عليك وتتخنق مني وتحس اني بأفرض حبي واهتمامي عليك وعلى حياتك بالعافية .

بس غصب عني كنت بتمنى الاقيك حاسس بيا تتصل تقول لي وحشتيني زي البنات العادية يعني .. ماهو انا اه متفهمة انك مالكش في الكلام دا وانك عقلاني قوي بس كنت بتمناه او يمكن لانك مش حاسس بيه ف مش بتقوله ليا :(

طبعا انا عمري ماهعرف لان الوحيد اللي عارف هو انت ..

لما كنت بكون معاك كنت بتمنى الوقت يقف يمكن انت كنت بتتمنى يخلص بسرعة :)

بس انا كنت بعيش احلى دقايق .. اكيد انت جربت قيمة انك تقعد مع حبيبك ونفسك الوقت مايعديش .. كنت بفكر يا ترى الاحساس دا كنت بتحسه معايا ولا فعلا كنت تتمنى يخلص بسرعة علشان تخلص من اللازقة اللي متبتة فيك دي :)

انا حبيتك قبل ما اقابلك حبيت الروح اللى كنت بتكلم معاها حبيت الدماغ اللي كنت بناقشها حبيت البورتريهات اللي كنت ببعتها واحس انها عجبتك .. واي كان شكلك او كنت مين كنت هافضل احبك نفس الحب بنفس الطريقة..

لا كنت بتمنى تقول لي اتجوزيني لاني عارفة انه ماينفعش ولا انك تقول لي نرتبط كنت عاوزة بس احس ان شعورك متبادل معايا ..

حسيته في لحظة .. تاني مرة اتقابلنا فيها كانت احلى واجمل مقابلة كنت واحد حسيته مهتم وبيحبني ايوا انت مش قلت لي بأحبك بس كنت حاساها في كلامك وتصرفاتك ومكالماتك يا ترى دا كان وهم ولا فعلا حقيقي ؟

طيب راح فين ؟ ايوا انت انسان مودي ومزاجي بس اعتقد مشاعرك مش هاتتغير في يوم وليلة !! ..

بعد مقابلتنا التالتة كله اتغير وانا معاك حتى ماكنش نفس احساس المرة اللي قبلها ولا نفس النظرة ولا حتى اللمسة كنت كأنك واحد تاني وعملت كذا حاجة ضايقتني قوي بس ماقدرتش اتكلم لأني مش من حقي احاسبك ..

 وبعدها اتقلبت كل حاجة الاهتمام والاحاسيس والمكالمات اصبحت مش موجودة :(

انا كنت بس عاوزة احس انك بتبادلني نفس احاسيسي كنت عاوزة اعيش كل حاجة معاك كان نفسي احس ان اي حاجة بنعملها سوا احنا الاثنين حاسينها سوا مبسوطين سوا وتبقى اول مرة اعيشها معاك انت ..

ايوا انا عارفة اننا هانبعد انت ماينفعش ترتبط بيا انت مفروض عليك ترتبط ارتباط معين ارتباط عقل وممكن يكون قلب وعقل بس لازم تختار على اسس معينة بتفرضها عليك ظروفك وحياتك وشغلك انا مانفعش مش تقليل مني لكن كل الظروف والمشهد العام بيقول اني مانفعش .. بس اتمنيتها مش هانكر ..

 انا ماكنتش انانية في حبي ليك بس كنت انانية في احساسي معاك كنت عاوزاك تكون معايا بكل حاجة قلبك وعقلك وتفكيرك حتى ولو دقايق بس ..

 لما عملتني ادمن لصفحاتك فرحت واستغربت مع بعض ورغم امكانياتي المحدودة كان نفسي قوي اعمل حاجة تفرحك كان نفسي احس اني باعمل حاجة تخليك تعرف انت في نظري ازاي .. انت حاجة كبيرة قوي في نظري ودايما هاتفضل ..

شهر رمضان كان بالنسبة لي حاجة حلوة بجد اول مرة احس اننا قريبين اول مرة احس اننا بنعمل حاجة ونتناقش سوا وبعد رمضان ماعرفش حصل ايه انت بعدت

لدرجة اني حسيت انك ممكن تكون ندمت انك عملتني ادمن واني خذلتك ولحد النهاردة انا مش عارفة ..

ساعات كنت بأحس انك اناني بتعمل اللي انت عاوزه وقت ما انت عاوز مش مهم الناس التانيين عاوزين ايه .. مشاعرهم ايه .. كنت بضايق لما اكون محتاجة لك ونفسي اتكلم معاك وماعرفش الاقيك كنت بكون متغاظة قوي بس ارجع التمس لك الاعذار واقول معلش هو مختلف عن الناس في كل حاجة في تصرفاته وافكاره وحياته ..

يوم الامتحان مش هاقولك انا خاب املي ازاي كنت راسمة حاجة تانية في دماغي كنت بتمنى اليوم دا يكون هو الجامع لكل الذكريات كنت عاوزة اعمل فيه كل حاجة صح او غلط مش مهم .. المهم انها تكون معاك انت كل اللي كنت بفكر فيه اني اكون مبسوطة واخليك مبسوط يمكن تحب تقرب مني اكتر يمكن احس بيك وتحس بيا .. بس للاسف القدر بدأها وانت ختمتها :(

كنت بجد محتاجة لحضنك قوي اكتر من اي حاجة في الدنيا يمكن انت كنت بتحافظ عليا يمكن كنت حاسس بالمسئولية ناحيتي بس انا كنت محتاجة ساعتها لحبيب مش صديق ..

انا شبهك في حاجات كتير وعلشان كدا انا فاهماك او يعني ساعاات بفهمك الا حاجة واحدة احساسك بيا ..

انا كانت بتجيلي اخبارك من غير ما أسأل عرفت حاجات كانت بتقول لي ابعدي انتي مالكيش مكان .. وماكنتش بقدر أبعد .. كنت دايما حاسة انك زي الطفل الصغير وان من مسئوليتي اني افضل جنبك ..

انا عمري ما هالومك ولا هاحاسبك وانا قلت لك من الاول انا مش عاوزة ولا مستنية منك حاجة كنت مستنية بس تحسني يا ترى حستني فعلا ؟؟

يا ترى اللحظة اللي حسيتها انك حبتني فيها كانت حقيقية وانك حبتني في لحظة ما طيب راحت فين ؟

طيب ماحبتنيش خالص لو كنت رغبة بس بالنسبة لك كنت قول لي حقيقي كنت هاكون مبسوطة انك صريح معايا وماكنش فيه حاجة هاتتغير غير اني اعرف حدودي اي نعم كنت برضوا هاحبك بنفس الطريقة بس كنت هابقى عارفة انا بالنسبة لك ايه ؟

كنت دايما تقول لي احنا اصحاب بس كلمة اصحاب مالهاش معنى يعني اصحاب بنسأل على بعض ونقف جنب بعض في الازمات ؟ ولا اصحاب نسأل على بعض كل فترة وخلاص ؟؟ ولا اصحاب نتقابل ونعمل كل اللي العشاق بيعملوه ؟؟

اي نوع من الاصحاب احنا ؟؟

بالنسبة لي كنت حبيب وصاحب واخ .. 

انا كنت ايه بالنسبة لك يا ريت تجاوبني على السؤال دا بس من غير فلسفة:)

هو انا غلطت علشان حبيتك وضعفت ؟؟

يعني كنت لازم ماحبكش واللى اعمله معاك اعمله مع غيرك عادي بدون مشاعر ؟

ساعتها كنت هاكون مرتاحة مش كدا .. طبعا ما انا ماسكة كل الاحبال من النص ايه يعني لو خسرت واحد فيه غيره ؟؟

يا ترى اللي بيفكروا كدا هم دول اللي بيكسبوا في النهاية .. والعفوية بتخسر ؟؟ 

عارف السبب الرئيسي اني اجيب موبيل جديد اني لاقيتك مهتم بالواتس والفايبر قلت يمكن تكون حاجة تقربنا من بعض .. عبيطة :)

بس الغرقان بيتعلق في قشة زي ما بيقولوا ..

انا عمري ما هألومك على حاجة الا على انك ماحستنيش بجد كان نفسي قوي احسها انك حاسسني ومش معنى انك تحسني وتبادلني شعوري اننا نتجوز لان دا مش في ايدينا دا يرجع للنصيب ..

أنا حبيتك أكتر من اي حاجة حتى اكتر من نفسي  .. 

انا كدا قدامك شفافة زي البلّور انت شايف انا جوايا ايه وف لحظة وبكلمة منك تقدر تكسرني .. 

يا ريت ماتكسرنيش وتحترم كل لحظة حبيتك فيها وتصارحني محتاجة اسمعك قوي .. 

 

لآ أستطيع أن أقول لك :
أحبك
لكني أستطيع كتابة الكلمة بشفتيّ
فوق جبينك ، بصمت وأنت نائم
لتلتقطها أصابع أحلآمك !”
غاده السمان

 

قلب متعب

الإحتواء ..
هو كل ما أردت ..
لم أطلب وعوداً ولا خططاً مستقبلية ..
فقط أن تحتوي قلباً عانى كثيراً ، وتعب كثيراً ..
وأراد أن يستريح قليلاً ..
فأرهقته .

شاهي

أناني

أحببت من ليس لك ..
وأحبك من لست له ..
قوانين الحياة , مغلفة بأنانية بعض البشر .

شاهي

وكان

فاقد التقدير .

شاهي

كبرياء

لا تختبر كبرياء امرأة ..

سيأتي يوماً تثور لـ قلبها حتى وإن تنازلت .

شاهي

الثقة

عندما تذهب الثقة من أحب الأشخاص وأقربهم لا يبقى ملجأ الا الله والدموع .

 

شاهي

رد الفعل العكسي

يبدو أن قانون نيوتن ..

" لكل فعل رد فعل مساوِ له ويعاكسه في الإتجاه "

كان مقصوداً به العلاقات بين البشر .

شاهي

قلبك حجر

المشكلة مش إنك تكون مش فاهمني بس ..

المشكلة الأكبر إنك كمان تكون مش حاسس باللي فيا .

شاهي

وسأظل صامتة .

الصمت موجع ولكنه الحل الوحيد .

شاهي

أنت لست لي .

I'll leave you to 

هُنّ ..

 

شاهي

A tragedy

I wasn't rude with you, i was just honest 
Why you were rude with me
Most of our relationships end by this way, it just ends with rudeness and disrespect
Whatever what is it, love or friendship
What a tragedy
Shahy

أحبك

وبعدد ما شربت من قهوة في حياتك .

أحبك .

ذُل الحب :(

نقطة ضعفي ..

قلبي .

شاهي

أنت كالشوكولا

وكـ قطعة شوكولا ..
يذوب حبك في قلبي <3

 

شاهي

لازم نفوّق نفسنا

سهرانة تعيطي علشان واحشك أو قلقانة عليه ومش عارفة تكلميه !!

أحب أطمنك هو كمان سهران بيعيط ..

م الضحك والهزار مع غيرك .

 

شاهي

الوفاء لا وجود له

محدود الفكر من يظن أن الوفاء يأتي من الحب .. 

الوفاء يأتي من الإحترام والتقدير للطرف الآخر حتى دون وجود هذا الحب .

 شاهي

للأسف

كنت أعرف منذ اللحظات الأولى انني عابرة سبيل في عمرك !

 

غادة السمان

كنت أريد هذا الحب

أردتك أن تحبني بعينيك وعقلك وقلبك ..

وأظن أني فشلت في أحدهما لهذا لم يكتمل هذا الحب .

شاهي

هكذا

وهكذا سأعيش .. أغار دون علمك ، وأحبك وأنت لست لي ، وأخاف عليك وأنت لا تدري . 

غادة السمان

أردت الأمان بك

في هذا الوقت 

أردت أن أصرخ وأقولها ،

أيها الرجل أُحدثك لأني أريد أن أشعر بأمان ..

فـ رُغم البعد أردت أن أطمئن بك حتى وإن سمعت صوتك لحظات ..

فـ صوتك هو الأمان لي ..

ليتك تعلم ما أريد ..

 ليتك تشعر .

 

شاهي 

ليس خطأك

ولكنه قلبي الذي يخونني ..
يحبك .. رغم عدم وفائك لـ حُبي .

شاهي

كنت حاسة بكذبك لحد ما جت الحقيقة ليا على طبق من فضة

مقولة الكذب مالوش رجلين فعلاً صادقة جدا ً ..
خصوصا ً لما تلاقي الحقيقة جاية لحد عندك من غير ما تسعى ليها من الأساس ..
اكذبوا وخبوا وداروا براحتكم الكون بيخطط ضدكم فلا مفر من ظهور الحقيقة دائماً وأبداً ..
واللي هاتكسبه مش خسارة إحترام ناس بيحبوك وبس ، لأ كمان هاتيجي لحظة ومش هاتصدق أي شخص وهاتخسر نفسك .
شاهي

قلوب ماتت

ويتصل .. يتأكد أنهم لن يتقابلوا لـ يستقبل أخرى ..

تباً للقلوب العامرة بـ قلة الوفاء ، وكثرة الرياء .

شاهي

لست أنانية في حبك

ساعات بأحس أنك محتاج حد يمسكك من أكتافك ويقعد يهز فيك بعنف علشان يصفي دماغك أو يشقلبك ويمسكك بالمقلوب من رجليك..

يا ريتني سوبر وومن :)

او تحب من قلبك بجد حتى وإن كانت غيري ..

شاهي

حقيقة

ويتغير مزاجي وكل يومي متى ما سمعت صوتك حتى وإن كنت مستاءاً .

شاهي

كنت عارفة

بتكون عارفة إنك بتكلم غيرها ورغم ذلك تعمل نفسها عبيطة يمكن تحِس وتقدّرها ..
بس هاييجي منين الإحساس للي ماعندوش قلب .

شاهي

قسوة القلب الطيب

ورغم طيبة قلبك .. بأحس إن قلبك حنين مع كل الناس .. وعليا أنا قاسي :(

شاهي

حب أم صداقة

وكم من قلب نابض بالحب يختبئ تحت جناحي الصداقة ..
فلا هو قادر على أن يُجاهر بحبه .. ولا قادر على الإبتعاد .

شاهي

اهمال

تهتم به .. ويهتم بأخرى .

شاهي

 

حبك اودعته لله

أودعت حبي لك عند الله حتى لا أُعذّب بالحرمان منه ..

إن كان حبك خيراً سيجلبه الله لي على ضعف مني ..
وإن لم يكن خير فهذا أيضاً خير ..
لربما كان حبي شراً لك وأبعده الله عنك ليأتيك بخير منه .

شاهي

مين صاحبي

ومين فينا ماجتش عليه لحظة وفكر ..
يا ترى مين هايزعل عليا بجد لما أموت ..
مين هايبكي بحرقة على فراقي ..
مين هايدعيلى من قلبه لما أفارق دار الفناء لدار البقاء ( ربنا يغفر له ويثبته عند السؤال ) ..
مين صاحبي اللي بجد ومين اللى مش صاحبي ..
رغم ألم ووجع فراق الموت لكن هو الحقيقة الوحيدة اللى بتكشف زيف القلوب أو صدقها .

شاهي 

دعه يرحل

من قام بالغروب من حياتك ..
تأكد أنه ذهب ليشرق في حياة شخص آخر ..
فلا تحزن ربما غروبه من حياتك .. شروق لحياة أفضل بدونه .

شاهي

...

أنا أحترق وهو يفترق.

شاهي

هذا هو الحب ..

عارف أنت لما الأم يصعب عليها نفسها إن إبنها مش بيسأل عليها ..

وماتسألش عنه وكأنها بتعاقبه بعدم سؤالها ، وهى ملهوفة تسمع صوته يطمنها..

 ورغم ذلك بتطمن عليه من بعيد لبعيد..

أنا كدا بيصعب عليا إنك مابتسألش عني ، وصعب أسأل عليك ..

 ورغم ذلك ماقدرش ماطمنش عليك حتى ولو من بعيد لبعيد .

شاهي

موعد للقاء .

أحب أن أحدد موعدا مسبقا لرؤيتك ..
فلا أحب أن آتي إليك لأفاجئك وأجدك تودع أخرى ..
أريد عند لقائنا أن أشعر بالسعادة لا بالألم حتى وإن كنت لغيري ..

شاهي

ثورة 30 _ 6

أنا كنت واحدة من الناس اللي ماكنش عندها أمل في يوم 30 _ 6 وكتير كنت بقول لأصحابي إن مافيش حاجة هاتحصل وإني مش متفائلة ، بس أنا قلت هانزل وأعمل اللي عليا لأني رافضة كل اللى بيحصل ..

وحقيقي إتفاجئت بمعنى كلمة إتفاجئت باللي عملوه الناس واللى نزلوا وصمموا على إختيارهم لحياة حرة كريمة خالية من العنصرية والتمييز بين المصريين ( أنت إخواني عظيم - وأنت فلول عميل _ وأنت كافر لأنك معارض )

دا غير العيشة الصعب اللي اتفرضت على الشعب ومطلوب منه يتحمل ومافيش حد بيقدم له حلول .. ولا حتى بيصارحه ( دا أغلب شعبنا بينضحك عليه بكلمة افتكروا مبارك وخطابه بتاع سيبوه ال 9 شهور كله الدمعة فرت من عينه سيبوه يا جماعة هو قال مش هايكمل ) ..

مرسي لم يكن يستحقها لم ينفذ أي من وعوده ..
حقوق الشهداء اتنست ( والبراءات تشهد ) ..
وعود ال 100 يوم اتنست ( والبلد من تقشف لتقشف وماحدش سائل فيهم ) ..
زيادة الأسعار بشكل بشع ( والأجور هاتكفي ازاي وهى زي ما هي ) ..
تكبر وتعنت وغرور فاق الحدود وكل قرار يخرج من مكتب المرشد ( واللي يقول غير كدا يبقى فعلا عايش مغيب ) ..

عاوزين الناس بعد دا كله تسكت وتتنازل عن حقها وحق بلدها بعد اللى شافوه من تمييز وتفرقة دا غير التصريحات الغبية جدا المستفزة للشعب اللى مابقاش حاسس إنه عايش ..

الناس نزلت لأنها شافت إن من حقها تاكل عيش نضيف _ وتقول رأيها بحرية من غير ما حد يكفّرها _ ويكون فيه عدالة إجتماعية وإن كله أمام القانون سواء ..

مصر للمصريين جميعا ( أقباط _ ومسلمين ) لا فرق بينهم الدم كله واحد ..
وتحيا مصر دائما .

كفاية

كفاية مهانة ..
كفاية ذل ..
كفاية تعب ..
كفاية لأي حد مش بيقدرني ولا بيحترمني ..
كفاية تضييع وقت ..
كفاية تجاهل ..
كفاية قلة إحترام ..
كفاية حب مش متقدر ..
كفاية خيانة ..
كفاية قلة تقدير ..
كفاية تضحية ..
كفاية ظلم ..
كفاية خوف ..
كفاية ضعف ..
كفاية حزن ..
كفاية دموع ..
كفاية وجع قلب ..
كفاية .. كفاية .. كفاية

شاهي