دايما لما تلاقي حد مضايق تقوله روّق يا عم مافيش حاجة مستاهلة ؟
ولما هو مافيش حاجة مستاهلة احنا عايشين ليه لأن أكيد فيه حاجات تستاهل نعيش علشانها ..
هانبدأ ب إحنا ليه إتخلقنا .. اتخلقنا علشان نعبد ربنا ( الحقيقة المجردة )
وتفتكروا العبادة صوم وصلاة وزكاة وبس ؟؟
لو كانت كدا كان كل الناس فضلوا عايشين في دور العبادة مايعملوش أي حاجة غير إنهم يعبدوا ربنا ليل نهار ..
لكن لأن ربنا أعلم بالإنسان من الإنسان نفسه ساب له عقله علشان يفكر بيه ويفهم ويميز الدنيا والأمور من حواليه .
يعنى لولا عقل الإنسان ماكنش حد اخترع النار ولا كان حد اخترع اللبس ولا أي اختراع تاني بنستفيد منه دلوقتى ؟؟
لو فعلا مافيش حاجة تستاهل كنا زمانا عايشين في عهد سيدنا آدم نعبد الله بنكّفر عن خطأ سيدنا آدم في خروجه من الجنة .
بس الحقيقة فيه حاجات تستاهل ..
زي الأهل ، زي السعادة ، زي راحة البال ،
زي الأهل ، زي السعادة ، زي راحة البال ،
كل دى حاجات تستاهل ..
زي الحُب ، زي الإنتماء ، زي الوطن ،
ودي برضوا حاجات تستاهل ..
لما حد عزيز عليك يموت أكيد يستاهل تحزن عليه ،
ولما تحلم بحاجة وماتوصلش ليها تستاهل تتعب من تاني وماتفقدش الأمل ،
لما صديق أو حبيب يبعد عنك العِشرة بينكم تستاهل تزعل عليها ،
لما حد يفرّحك بهدية ولما طفل جديد يتولد الموقف دا يستاهل الفرحة ،
لما تعمل خير وتحس ان انت سبب في تفاؤل انسان يبقى اكيد يستاهل .
إحنا كل حاجة في حياتنا تستاهل ،
الفرح والحزن والألم واحساس الفقد ،
كل مشاعرنا تستاهل وكل المواقف في حياتنا تستاهل ..
لأن لو مافيش حاجة في الدنيا دي تستاهل يبقى المفروض نعيش في عزلة عن الدنيا اللى كل حاجة فيها تستاهل واحنا بنقول عليها ماتستهلش .
شاهي
ليست هناك تعليقات:
إرسال تعليق