الفراق

كتير أسمع ناس تقول كله إلا فراق الأب - كله إلا فراق الأم - كله إلا فراق الزوج أو الإبن أو الأخ ...
مافيش وجع منهم أقل من الثاني ..
الوجع بفراق الموت خاصة كله صعب كله لا يحتمل ..
وجع فراق الموت أكثر فراق بيعصر القلب من الألم مابتقدرش تخرج منه بسهولة ..
وعلى قدر تعلقك بالشخص على قدر الألم ،كل ما كنت مرتبط بيه زيادة قوي كل ما كان الوجع بزيادة قوي قوي ..

الحياة هاتستمر آه أكيد لكن هايفضل الوجع موجود ..
هانفضل كل ما نفتكرهم عيوننا تدمع وقلوبنا تتوجع من عدم وجودهم معانا في أكثر اللحظات اللي كنا نتمنى تكون معاهم ..
ونندم على كل لحظة كانوا موجودين فيها وقصرنا فيها معاهم ..
استغلوا وجود أحبائكم أيً من كانوا في إسعادهم ..
وأخيراً لا نملك إلا الصبر والدعاء ..
الصبر على الفراق ..
والدعاء لهم ولنا .
شاهندة

بعض من مبررات رجال مصر :)

2010
أنا بأحبك بس ماقدرش أرتبط بيكي علشان أنا عاوز أتجوز واحدة أصغر مني علشان تقدر تجيب أطفال ( كنت في سن ال 30 ) 

 

2014
أنا معجب بيكي بس ماقدرش أرتبط بيكي لسبب خاص ماقدرش أقولك عليه وكمان أنا نص مصري ونص أجنبي ماينفعش نرتبط
‫#‏حدث_بالفعل‬

 

الناس دي سمعت قبل كدا عن ملك بريطانيا اللي تنازل عن عرش مملكة بحالها علشان سيدة مطلقة ومن عامة الشعب لأنه حبها جداً ..
ولا عن أمير موناكو اللي اتجوز جريس كيلي الممثلة من عامة الشعب ..
الناس دي وأشباهها ماتعرفش أي شئ عن الحب تعرف حاجة واحدة بس التسلية ثم البحث عن الزوجة الفاضلة اللي ماتكلمتش مع شخص غيره :))
صحيح مش كل الملوك كدا لكن كل من يملك قلباً محباً فهو ملك :)
شاهي

اعتبروها زي فضفضة كدا بس محتاجة اكتب الكلام دا علشاني أنا ..

كتير جداً بأحس إني بدون فائدة كائن غير فعال في المجتمع وغير مفيد للعالم وإن حياتي بتضيع مني وإنها بدون معنى أو هدف ..

بس على المستوى الشخصي بـ أساعد أختي في تربية أولادها بالنصيحة وبأحاول أسعدهم على قدر مقدرتي .. بـ أراعي بابا وماما وأشوف احتياجاتهم ..

مش هأنكر كتير جدا بأكتئب وأحس إن حياتي بلا هدف وإنها ضائعة لأن المحصلة

" الدنيوية " زيرو

لكن الإنسانية ،وإني ماقصرتش معاهم أعتقد والله أعلم إنها كبيرة ..

اليأس والإكتئاب سواد كتير بيملاني بيختفي وبنساه في لحظة واحدة لما أشوف إبتسامة بابا وأحس إنه مرتاح ودعوة منه ، لما أشوف بنت أختي أو إبنها وفرحتهم في عينيهم علشان لعبة ولا علشان كارتون ولا دخلة ابن إختي عليا الصبح ماسك في إيده كيس الفطار ويجري على أوضتي مخصوص من بابا الشقة واستحالة يدي الكيس لحد تاني غيري

أنا يمكن دوري إني أفيد المجتمع أو العالم لسا مجاش .. يمكن يجي ويمكن لاء بس أمنيتي إنه يجي يوم وشخص واحد في الكون يفتكر إني كنت سبب في لحظة سعادة زرعتها في قلبه حتى لو كان الشخص دا بنت أو ابن أختي بس .

‫#‏إسعد_قلب_واحد‬

شاهي

والحزن ساكن في القلب مستديم..
تيجي السعادة على باب القلب تدق دقتين ..
تلاقي الحزن ساكن قديم..
تمشي..
ماهو أصل القلب مايسعش الإثنين..
وتفضل يا حزن الساكن المستديم.
شاهي

ورقة ميلاد ..
ورقة ممات ..
 كان لي بينهما وريقات ماتت فيها الكلمات .

شاهي

اتقوا الله تنصلح احوالكم

والله لو اجتمع شيوخنا أو شخص ما أي كان علشان يقنعوني إن ربنا هايدخل بنت النار علشان لبسها ولا هايدخل واحد بيعبد ربنا بطريقة معينة الجنة وواحد تاني هايدخلوا النار علشان مش بيعمل كدا ..

ولا هاقتنع بكلامه أساسا خصوصا دلوقتي اكتر من أي وقت فات ..

( عموماً أنا مش بسمع أي شيوخ علشان أنا بأحسهم عندهم نقص )

بعد اللي شفته في المسجد النبوي والمسجد المكي من كل أشكال وأنواع اللبس والأطياف صعب أقتنع إن اللي كانت بتصلي جنبي سواء هندية ولا تركية ولا باكستانية ولا أفغانستانية ولا حتى إيرانية ولا أيً كانت إيه جنسيتها ربنا هايدخلني أنا الجنة علشان لبسي وهي هاتدخل النار !!

كنا واقفين صفوف واحدة موحدين بإله واحد متعلقين بشغف واحد بنصلي بطريقة واحدة اللي في قلوبنا بس هو المختلف ، مين فينا بقا تُقبل منه ومين لاء دي مش بتاعة أي كائن بشري على وجه الأرض بتاعة ربنا وبس ..
سواء رجل أو أنثى ..

يقول الله تعالى " يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِنْدَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ " الحجرات 13

قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ إِنَّ اللَّهَ لا يَنْظُرُ إِلَى صُوَرِكُمْ وَأَمْوَالِكُمْ وَلَكِنْ يَنْظُرُ إِلَى قُلُوبِكُمْ وَأَعْمَالِكُمْ

يا أيها الناس ! إن ربكم واحد ، وإن أباكم واحد ، ألا لا فضل لعربي على عجمي ، ولا لعجمي على عربي ، ولا لأحمر على أسود ، ولا لأسود على أحمر ، إلا بالتقوى ، ( إن أكرمكم عند الله أتقاكم )

شاهي

الرقص زمان

زمان على ما أتذكر من فن الرقص في اللي كنت بأشوفه في الأفلام كانت الراقصات بيعرفوا كل الرقصات العالمية زي الرومبا والسامبا وتشاتشا والتانجو وطبعا بالإضافة للرقص الشرقي اللي كان نوع من أنواع الفن الإيقاعي ..
وكنا ننظر لهم على إنهم فنانات لا يقلون عن الفنانين والفنانات في التمثيل والغناء ..
وليسوا راقصات عاريات يثرن الشهوات ..

حالياً الراقصات لا يتقن إلا الرقص الشرقي .. الذي أصبح مرتبط فقط بإثارة الغرائز ..

يا ترى الغلط في مين في الفكر ولا في من يطلون علينا حالياً من راقصات وأصبح الرقص الشرقي منصب فقط على الإثارة وليس الإبداع ؟!!
#مجرد_تساؤل
شاهي

أين أنت ؟!!

تشتاق ذراعاي اليك ..

يشتاق صدري لدفء صدرك ..

تشتاق عيني الى لمعان عينيك ..

تشتاق شفاهي لنطق اسمك ..

يشتاق قلبي لنبضات الحياة ..

دونك لست على قيد الحياة ..

دونك أنا على قيد الانتظار للحياة .

شاهي

قلب

قلب حنين بس وحيد ,, عايش للناس وهم بعيد ..
نفسه في حضن حبيب يواسيه ,, من كل حاجة ينسّيه .

شاهي

أمنيات

كم أتمنى أن يعلم مقدار حبي له ..
فـ بين نبضة قلب وأخري تليها توجد نبضات تصرخ ..

 أعشقه .

شاهي 

كلنا مدعون

عاوزين ايه من شعب وبلد مدّعي ..
مدّعي الثقافة ، مدّعي التدين ، مدّعي احترام الآخرين وحرياتهم ومعتقداتهم ، مدّعي الرحمة ، مدعي الأخلاق ، مدعي التقدم العلمي ، مدعي التسامح ..
كلنا ننافق أنفسنا كلنا مدّعون .

شاهي

كفرت بالحب

كانت تؤمن بالحب إيماناً صادقاً .. فكفرت به كُفراً مبيناً ..
كانت طاهرة القلب في محرابه .. فـ دنسّها في محراب غيره ..
فـ لا تلومن البئر على جفاف مياهه ..
إنما اللوم على من ألقى الأحجار في جوفه فأوقف سَريَانُ الحياة .

شاهي

أريد النسيان

فى حياة كل انسان شئ ما يتمنى نسيانه..

وأنا أتمنى أن أنسى من أنا .

شاهي

القهوة وأنت

وكلما شربت القهوة تذكرتك ..
فمرارتها تذكرني بذكرياتنا معاً ..
فهجرتها مثلما هجرتني .
شاهي

اللمسة الأولى

وتكون اللمسة الأولى زي المليون ..
نفس اللهفة نفس الإحساس نفس رعشة الإيد ..
نفس نبضة القلب اللي ممكن يسمعها الكون

شاهي

:(

ماكنتش عاوزاك علشاني تتغير ..
كنت عاوزة بس حُبي تقدّر .

شاهي

بالنسبة للأبراج يا بنات ويا رجال ..

#وجهة_نظري

ركزي معايا حبيبتي ..
*مافيش بنت مش عاوزة الرجل يهتم بعقلها وثقافتها وروحها قبل شكلها .. بس يعني تهملي في نفسك وتقول لي أصل له بيحب روحي هايبص على أول ذيل فستان معدي من جنبه ،
( حقه الصراحة ) خصوصاً لو كان لمح لك
*مافيش بنت مش عاوزة تحس بالإهتمام وإن الشخص اللي بتحبه بيخاف عليها وبيهتم بمشاعرها ..
*مافيش بنت مش بتتمنى إنه يحس بيها ويحس بوجعها ووقت الأزمات يكون داعم قوي لها ..
*مافيش بنت مش بتتمنى تلاقيه بيساندها في أحلامها وطموحاتها ..
*مافيش بنت بتحب الكذب والخداع والخيانة .. كلنا بنحب الصراحة والوضوح والإخلاص ونكره اللف والدوران ..

كل البنات كدا إلا من ندر منهن اللي بتكون عايشة بلا هدف ..

بالنسبة للرجل يا أختاه ..
*مافيش رجل مش مودي قاعدة ثابتة اعرفيها كلهم مِزاجيين ..
*مافيش رجل بيحب الزن ممكن يجي بالزن بس علشان يريح دماغه لكن ممكن أكثر يعند علشان تبطلي زن ..
*مافيش رجل عينه مش زايغة قاعدة ثابتة أخرى علشان تريحي دماغك بس المهم طريقة وفكرة زوغان عينه بمعنى ...
- فيه رجل يعجب بالجمال مش أكثر دا اعتبريه صديق وتجاوبي معاه عادي وهزروا ..
- وفيه رجل يعجب وعاوز يجرب دا يعني جاريه في كلامه بس ماتشجعيهوش وحذريه بهزار ..
- وفيه رجل بقا يعجب بالجمال وعاوز يجرب ولازم يجرب دا تدي له فوق دماغه وترميه من حياتك أصلاً ..

*مافيش رجل بيحب الخيانة والكذب واللف والدوران ( بيقولوا كدا ) بس ماعلينا يعني
*مافيش رجل مش بيحب الخروج والفسح إلا من ندر منهم قوي قوي ..
*مافيش رجل رومانسي 24 ساعة سعادتك كدا مش هاتلاقوا تاكلوا بس على مستوى آخر فيه رجل مهتم ( الإهتمام غير الرومانسية خااالص ) ..

في المطلق العام مافيش رجال ملاعين ولا فيه نساء ملعونات ..
ومافيش أبراج متوافقة ومافيش أبراج غير متوافقة والدليل ..
ممكن تلاقي برجين يقولوا دول مش متوافقين ويبقوا سمن على عسل ..
والعكس برجين المفروض يكونوا آخر إنسجام بس تلاقيهم آخر شد وتقطيع في فروة بعض ..

ف الموضوع مالهوش دعوة بالأبراج خالص دا ليه دعوة بالشخصية اللي معاك/ي وأخلاقه/ا ..

جاري التعديل لو افتكرت حاجة تانية
شاهي

الروح

والروح تصرخ هل من منصت .

 

شاهي

أنا مج ..

متعلق على رف الدنيا جوايا فاضي ..
يوم تلاقي جوايا سخن ، أو بارد ويوم يبقى جوايا فريش ..
يفتكروني وقت العوزة ولو مش متعاز أنا دايما متلعق ع الرف ..
وإن لحظة سهوة وقعت لو ما إنكسرت يبقى أكيد إنشرخت .
أنا مج .

شاهي

إلى رجل أحببته من سويداء القلب ..

فــَ لتشهد أني قد غفرت لك ..
أُشهد الله أني قد غفرت لك ..
أُشهد الكون أني قد غفرت لك ..
أُشهد البشر أني قد غفرت لك ..

غفرت لك تجاهلك ، غفرت لك لامبالاتك ، غفرت لك صمتُك ، غفرت لك عِنادك ،
غفرت لك جنونك ، غفرت لك نسيانك لي ..

فـ اشته ما شئت من النساء ..
أحبب من شئت منهن ..
انهل من نبيذ شفاههن ..
وارتع بين ربوع مفاتنهن ..
 
امض إلى المستقبل دون ذنبي فقد طهّرتك منه ..

فـ المغفرة لي ..
والقلب لي ..
والحُب لي ..
والنسيان لي ولك .

شاهي